സമൂഹത്തില് പലപ്പോഴും സമാനമായ ചോദ്യങ്ങള് ഉയര്ന്നു കേട്ടിട്ടുണ്ട്. ഇതിനെ സംബന്ധിച്ച എന്റെ അഭിപ്രായം ചുവടെ.(മാര്ക്സിസ്റ്റ് പദങ്ങള്ക്ക് കൂടുതല് വിശദീകരണം നല്കിയിട്ടില്ല എന്ന പരിമിതി ഈ കുറിപ്പിനുണ്ട്).
1. ആരാണ് കമ്മ്യൂണിസ്റ്റ് ?
ഒരുവന്റെ ശബ്ദം മറ്റൊരുവന് സംഗീതം പോലെ അനുഭവപ്പെടുന്ന തരത്തില് മാനസിക വിശാലതയുടെ അത്യുന്നതിയില് എത്തിയിട്ടുള്ളതും വര്ഗ്ഗരഹിതവും(മുതലാളി - തൊഴിലാളി വര്ഗ്ഗങ്ങള് ഇല്ലാത്ത) അധീശത്വ - അധീനത്വ രഹിതവും(ഭരണകൂടമോ അതിന്റെ മര്ദ്ദനോപകരണങ്ങളോ ഇല്ലാത്ത) ആയ സമൂഹമുള്ള ഒരു പുതിയ ലോകം - ഇതാണ് കമ്മ്യൂണിസ്റ്റ് ലോകം. മനുഷ്യന് പൂര്ണ്ണതയില് എത്തിച്ചേര്ന്ന സുന്ദരമായ ലോകം. ഇങ്ങനെ ഒരു ലോകത്തിന്റെ സൃഷ്ടിക്കായി പരിശ്രമിക്കുന്ന കമ്മ്യൂണിസ്റ്റ് പാര്ടി അംഗങ്ങളേയും ആശയഗതിക്കാരെയും കമ്മ്യൂണിസ്റ്റുകള് എന്ന് വിളിക്കാം.
2. എന്താണ് മാര്ക്സിസം? ഇതുമായി കമ്മ്യൂണിസ്റ്റ് പാര്ടിക്കുള്ള ബന്ധമെന്ത്?
അദ്ധ്വാനിക്കുന്ന ജനകോടികളുടെ ശാശ്വതമായ മോചനത്തിനുള്ള സാമൂഹികവിപ്ലവത്തിന് പ്രചോദനം നല്കുന്ന പ്രപഞ്ച വീക്ഷണമാണ് മാര്ക്സിസം. കാറല് മാര്ക്സിനു മുമ്പും നിരവധി ദര്ശനങ്ങള് ഉണ്ടായിട്ടുണ്ട്. അവയൊന്നുംതന്നെ സാമൂഹികമാറ്റത്തിന് കാരണമായിട്ടില്ല."നാളിതുവരെയുള്ള ചരിത്രകാരന്മാര് ലോകത്തെ വ്യാഖ്യാനിച്ചിട്ടേ ഉള്ളു. നമ്മുടെ ലക്ഷ്യം ലോകത്തെ മാറ്റിമറിക്കലാണ് "-കാറല്മാര്ക്സ്
ജര്മ്മന് ക്ലാസിക്കല് ഫിലോസഫി, ഇംഗ്ലീഷ് അര്ത്ഥശാസ്ത്രം, ഫ്രഞ്ച് വിപ്ലവം എന്നിവയുടെ സ്വാധീനം മാര്ക്സിസത്തിന്റെ രൂപീകരണത്തിന് കാരണമായിട്ടുണ്ട്. ലോകത്തിന്റെ മൂന്നിലൊന്നു ഭാഗത്ത് സോഷ്യലിസ്റ്റ് സമൂഹം സ്ഥാപിക്കുന്നതിനും മറ്റുരാജ്യങ്ങളില് വളര്ന്നുവരുന്ന തൊഴിലാളി മുന്നേറ്റത്തിന്റെ ചാലകശക്തിയാകുന്നതിനും ഈ ആശയത്തിന് കഴിഞ്ഞിരിക്കുന്നു.
"മാര്ക്സിസം പ്രയോഗത്തിന്റെ ശാസ്ത്രമാണ്"-അന്റോണിയോ ഗ്രാംഷി.
കമ്മ്യൂണിസ്റ്റ് പാര്ടികളുടെ വിപ്ലവപ്രര്ത്തനങ്ങളെ മുന്നോട്ടുനയിക്കുന്ന സിദ്ധാന്തമാണ് മാര്ക്സിസം.
"സിദ്ധാന്തം ഇല്ലാത്ത പ്രയോഗം അന്ധവും പ്രയോഗമില്ലാത്ത സിദ്ധാന്തം വന്ധ്യവുമാണ്"- ജോസഫ് സ്റ്റാലിന്
മാര്ക്സിസ്റ്റ് ദര്ശനത്തിന്റെ അടിസ്ഥാനം വൈരുദ്ധ്യാത്മക ഭൗതികവാദമാണ്
3.എന്താണ് ഭൗതികവാദം?
ദ്രവ്യം(matter) ആണ് പ്രാഥമികം എന്നും ദ്രവ്യത്തിന്റെ സ്വാധീനത്താല് ആശയം അഥവാ ചിന്ത ഉണ്ടാകുന്നു എന്നും ഭൗതികവാദക്കാര് പറയുന്നു. ഭൗതികയാഥാര്ത്ഥ്യങ്ങളുടെ ഉത്ഭവകേന്ദ്രമായ ഭൗതികപ്രപഞ്ചം എങ്ങനെ വളരുന്നു എന്നും ആ വളര്ച്ച ആത്മീയപ്രപഞ്ചത്തെ(ചിന്തയെ) എങ്ങനെ സ്വാധീനിക്കുന്നു എന്നും യുക്തിസഹമായി വിശദീകരിക്കുവാന് ഭൗതികവാദത്തിന് കഴിയുന്നില്ല. ഭൗതികവാദത്തിന്റെ ഈ ദൗര്ബല്യം പരിഹരിച്ച് ഭൗതികപ്രപഞ്ചവും ഭൗതികേതരപ്രപഞ്ചവും(ആശയം, ചിന്ത, വികാരം മുതലായവ)തമ്മിലുള്ള ബന്ധം തികച്ചും ശാസ്ത്രീയമായി വിശദീകരിച്ചുകൊണ്ട് മാര്ക്സ് വൈരുദ്ധ്യാത്മക ഭൗതികവാദത്തിന് രൂപം നല്കി.
4.എന്താണ് വൈരുദ്ധ്യാത്മക ഭൗതികവാദം?
ബാഹ്യപ്രപഞ്ചത്തിലെ ഭൗതിക പദാര്ത്ഥങ്ങള്, മനുഷ്യന്റെ സൃഷ്ടിപരമായ ജീവിതം, മനുഷ്യചിന്തകളും ഭാവനകളും - ഈ മൂന്ന് രംഗത്തും പ്രവര്ത്തിക്കുന്ന നിയമങ്ങള് ഉള്ക്കൊള്ളുന്നതാണ് വൈരുദ്ധ്യവാദം. ഇതിന്റെ അടിസ്ഥാനത്തില് പ്രവര്ത്തിക്കുകയും വളരുകയും ചെയ്തുകൊണ്ടിരിക്കുന്ന ബാഹ്യപ്രപഞ്ചമാണ് സാമൂഹികജീവിതത്തിനും ആശയവികാരങ്ങള്ക്കും രൂപം നല്കുന്നത്. ഇതിന്റെ അടിസ്ഥാനത്തില് സാമൂഹികമാറ്റത്തെ മാര്ക്സ് ഇങ്ങനെയാണ് കാണുന്നത് - "ഒരാശയം ഒരു സമൂഹത്തെ സ്വാധീനിച്ചാല് അത് ഒരു സംഘടിത ശക്തിയായി വളരുകയും ആ ആശയത്തിന് രൂപംകൊടുത്ത സമൂഹത്തെതന്നെ മാറ്റിമറിക്കുകയും ചെയ്യും"
5.എന്താണ് ആത്മീയവാദം?
ആശയം ആണ് പ്രാഥമികം എന്ന് ഇവിടെ വാദിക്കുന്നു(ഈശ്വരന് ഉണ്ടായതിനുശേഷം ദ്രവ്യം ഉണ്ടായി എന്ന വാദം). ഈ പ്രപഞ്ചത്തില് ഇന്നുകാണുന്നതെല്ലാം ഈശ്വരസൃഷ്ടിയാണ്. ഭൂരിഭാഗം വരുന്ന ദരിദ്രരും ന്യൂനപക്ഷമായ ധനികരും ഉള്പ്പെടുന്ന ഈ സാമൂഹികവ്യവസ്ഥിതി ദൈവികമാണ്. ധനികര്ക്ക് ഭൂമിയില്തന്നെ സ്വര്ഗ്ഗം. ഇതിനെ ചോദ്യം ചെയ്യാന് പാടില്ല. ദരിദ്രര് ദൈവത്തെ വിളിക്കുക. അവര്ക്ക് മരിച്ചുകഴിഞ്ഞാല് സ്വര്ഗ്ഗം ലഭിക്കും. ഇതാണ് ആത്മീയവാദത്തിന്റെ അടിസ്ഥാനം.
6.ആത്മീയതയുടെ നിലനില്പ്പ് മാര്ക്സിസ്റ്റ് കാഴ്ചപ്പാടില്
മനുഷ്യന്റെ ബോധലോകത്തിന് അപ്പുറം അവന് എത്തിപ്പെടാന് കഴിയാത്ത അജ്ഞാതലോകമുണ്ട്. ബോധലോകം വികസിക്കുമ്പോള് അജ്ഞാതലോകം ചുരുങ്ങും. വിദ്യസമ്പന്നരില്പോലും ഈശ്വരവിശ്വാസം നിലനില്ക്കുന്നതിന് ഈ അജ്ഞാതലോകം കാരണമാകുന്നു. വളരെഅധികം അത്യാഹിതത്തിലുള്ള ഒരു രോഗിയെ പരിചരിക്കുന്ന ഡോക്ടര് സാധാരണ പറയാറുള്ള ഒരു വാചകം ശ്രദ്ധിക്കുക - "എന്നെക്കൊണ്ട് കഴിയാവുന്നതു ഞാന് ചെയ്തു. ഇനിയെല്ലാം ഈശ്വരന്റെ കൈകളിലാണ്". ഡോക്ടര്ക്ക് അജ്ഞാതമായത് ഈശ്വരന്റെ കൈകളിലാണ് എന്ന് അയാള് വിശ്വസിക്കുന്നു. നാളത്തെ ശാസ്ത്രലോകം ഡോക്ടറുടെ അജ്ഞതമാറ്റുമ്പോള് അയാള്ക്ക് ഈശ്വരന്റെ സഹായം വേണ്ടിവരില്ല. ആദിമ മനുഷ്യന് കാട്ടുതീയേയും കൊടുംകാറ്റിനേയും ഇടിമിന്നലിനേയും ഒക്കെ ഭയപ്പെടുകയും ഇവയൊക്കെ ഈശ്വരസൃഷ്ടിയെന്ന് കരുതി ആരാധിക്കുകയും ചെയ്തിരുന്നു. ഇതിന്റെ ഒക്കെകാരണങ്ങള് ബോദ്ധ്യമായ മനുഷ്യന് ഇന്നതിനെ ഭയപ്പെടുകയോ ആരാധിക്കുകയോ ചെയ്യുന്നില്ല.
7.പരിസമാപ്തി
ഭൗതികവാദത്തിന്റെ നേര് വിപരീതമാണ് ആത്മീയവാദം. അപ്പോള്, ഈശ്വരവിശ്വാസം കമ്മ്യൂണിസ്റ്റിന് അരുതാത്തതോ?- എന്ന ചോദ്യം, പഞ്ചസാര കയ്പ്പുള്ളതാണോ എന്ന് ചോദിക്കുന്നതുപോലെ നിരര്ത്ഥകമാണ്.
